Slow Living ໃນຍຸກທີ່ທຸກຄົນຟ້າວຟັ່ງ

 

Slow Living ໃນຍຸກທີ່ທຸກຄົນຟ້າວຟັ່ງ

The Art of Slow Living in a Fast-Paced World

"ຊີວິດບໍ່ແມ່ນການແລ່ນແຂ່ງເພື່ອຫາເສັ້ນໄຊ ແຕ່ມັນຄືການຊື່ນຊົມກັບທຸກກ້າວເດີນທີ່ເຮົາກ້າວຜ່ານ"

-------------------

ເທິງໜ້າຟີດໂຊຊ່ຽວມີເດຍທຸກມື້ນີ້ ເຮົາຈະເຫັນແຕ່ກະແສຂອງຄວາມຟ້າວຟັ່ງ ບາງຄົນໂພສອວດຄວາມສຳເລັດຕັ້ງແຕ່ອາຍຸຍັງນ້ອຍ, ບາງຄົນບອກໃຫ້ເຮົາຕ້ອງແລ່ນ ຕ້ອງເຮັດວຽກໃຫ້ໜັກ ຕ້ອງປະສົບຄວາມສຳເລັດໃຫ້ໄວທີ່ສຸດ. ປະກອບກັບສະພາບເສດຖະກິດທີ່ຜັນຜວນ ມັນຍິ່ງຜັກດັນໃຫ້ຄົນລາວເຮົາ ຕ້ອງໃຊ້ຊີວິດແບບຟ້າວຝັ່ງ ຈົນເກີດຄວາມກົດດັນ ແລະ ພາວະໝົດໄຟ (Burnout) ໂດຍບໍ່ຮູ້ຕົວ. ຫຼາຍຄົນມີເງິນ ມີຕຳແໜ່ງ ແຕ່ພັດຂາດຄວາມສຸກ ບໍ່ມີເວລານອນເຕັມອີ່ມ ແລະ ບໍ່ມີເວລາໃຫ້ກັບຄົນໃນຄອບຄົວ. ກະແສ "Slow Living" ຫຼື ການໃຊ້ຊີວິດໃຫ້ຊ້າລົງ ທີ່ກຳລັງເປັນກະແສ ເວົ້າເຖິງ ບໍ່ແມ່ນການຂີ້ຄ້ານ ຫຼື ການຢຸດພັດທະນາ, ແຕ່ມັນຄືກົນຈິດວິທະຍາການເລືອກໃຊ້ຊີວິດຢ່າງມີຄຸນນະພາບ ເພື່ອດຶງສະຕິ ແລະ ຄວາມສຸກໃຫ້ກັບຄືນມາຢູ່ໃນມືຂອງເຮົາເອງ.

ການປ່ຽນຈັງຫວະຊີວິດໃຫ້ຊ້າລົງ ແຕ່ໄດ້ຜົນງານ ແລະ ຄວາມສຸກທີ່ເພີ່ມຂຶ້ນ ມີແນວທາງການປັບໃຊ້ໃນຊີວິດປະຈຳວັນດັ່ງນີ້:

 

1. ຕັດສິ່ງທີ່ "ບໍ່ຈຳເປັນ" ເພື່ອເພີ່ມພື້ນຖານຄວາມສະຫງົບ

ຈຸດເລີ່ມຕົ້ນຂອງການໃຊ້ຊີວິດໃຫ້ຊ້າລົງຄື ການຮູ້ຈັກປະຕິເສດ ແລະ ຫຼຸດຜ່ອນພາລະ ທີ່ເກີນຄວາມຈຳເປັນ. ໃນແຕ່ລະວັນ ເຮົາມັກຈະຮັບເອົາທຸກວຽກ ທຸກກິດຈະກຳ ແລະ ທຸກຄຳເຊື້ອເຊີນ ເພາະຢ້ານວ່າໂຕເອງຈະຕົກກະແສ ຫຼື ຢ້ານຄົນອື່ນບໍ່ຮັກ. ສຸດທ້າຍເຮົາກໍ່ກາຍເປັນຄົນທີ່ຫຍຸ້ງຕະຫຼອດເວລາ ແຕ່ບໍ່ມີວຽກໃດທີ່ອອກມາດີເລີດ ແລະ ໃຈຂອງເຮົາກໍ່ເຕັມໄປດ້ວຍຄວາມວຸ່ນວາຍ.

ແນວທາງການປັບໃຊ້ຄື ການຫັນມາເຮັດ "Minimalism ໃນວິຖີຄິດ". ລອງນັ່ງທົບທວນເບິ່ງວ່າ ໃນແຕ່ລະວັນມີສິ່ງໃດແດ່ທີ່ເຮັດແລ້ວບໍ່ໄດ້ເກີດປະໂຫຍດຕໍ່ຊີວິດ ແລະ ຄອບຄົວ ແລ້ວຕັດມັນຖິ້ມໄປ. ເລືອກໂຟກັດເຮັດແຕ່ສິ່ງທີ່ສຳຄັນແທ້ໆ ວັນລະ 2-3 ຢ່າງ. ເມື່ອເຮົາຫຼຸດຄວາມຫຍຸ້ງເຫຍີງລົງ ເຮົາຈະມີເວລາຫາຍໃຈ ມີເວລາຄິດວິເຄາະວຽກງານຢ່າງລະອຽດຮອບຄອບ ເຮັດໃຫ້ຜົນງານທີ່ອອກມາມີຄຸນນະພາບສູງຂຶ້ນ ໂດຍທີ່ເຮົາບໍ່ຕ້ອງອິດເມື່ອຍຈົນເກີນໄປ.

 

2. ເຝິກຝົນໃນການມີສະຕິຢູ່ກັບ "ສິ່ງທີ່ຢູ່ຕໍ່ໜ້າ"

ຄວາມທຸກຂອງຄົນຍຸກນີ້ ມັກເກີດຈາກການທີ່ຮ່າງກາຍຢູ່ຈຸດໜຶ່ງ ແຕ່ຄວາມຄິດພັດແລ່ນໄປອີກຈຸດໜຶ່ງ. ເຊັ່ນ ຕອນກິນເຂົ້າກັບຄອບຄົວ ແຕ່ສະໝອງພັດຄິດຮອດເລື່ອງວຽກ ບາງຄົນກໍ່ຈ້ອງແຕ່ໜ້າຈໍໂທລະສັບ ເພື່ອຕອບຂໍ້ຄວາມ. ການເຮັດແບບນີ້ຈະເຮັດໃຫ້ເຮົາຂາດຄວາມຊົງຈຳທີ່ດີກັບຄົນອ້ອມຂ້າງ ແລະ ຮູ້ສຶກອ່ອນເພຍຕະຫຼອດເວລາ ເພາະສະໝອງບໍ່ເຄີຍໄດ້ພັກຜ່ອນຢ່າງແທ້ຈິງ.

 

ວິທີການປະຕິບັດຄື ການເຝິກມີສະຕິໃນທຸກກິດຈະກຳທີ່ລຽບງ່າຍ (Mindfulness). ເວລາກິນເຂົ້າ ກໍໃຫ້ຮັບຮູ້ລົດຊາດຂອງອາຫານ ແລະ ຕັ້ງໃຈລົມກັບຄົນຮ່ວມໂຕ້. ເວລາອາບນ້ຳ ກໍ່ໃຫ້ຮູບສຶກເຖິງຄວາມເຢັນຂອງນ້ຳ ທີ່ຊ່ວຍຜ່ອນຄາຍຄວາມເມື່ອຍລ້າ. ເວລາຍ່າງ ກໍໃຫ້ສັງເກດສິ່ງແວດລ້ອມອ້ອມໂຕ. ການດຶງຄວາມຄິດໃຫ້ກັບມາຢູ່ກັບປັດຈຸບັນ ຈະຊ່ວຍຫຼຸດຄວາມກັງວົນໃນສະໝອງ ປຽບເໝືອນການໄດ້ຊາດແບັດເຕີຣີ ໃຫ້ຫົວໃຈມີພະລັງງານບວກຢູ່ສະເໝີ.

 

3. ສ້າງ "ພື້ນທີ່ປອດຄວາມຮີບຮ້ອນ" ໃນແຕ່ລະວັນ

ການທີ່ເຮົາຕ້ອງແລ່ນຕາມເຂັມໂມງຕະຫຼອດ 24 ຊົ່ວໂມງ ຈະເຮັດໃຫ້ລະບົບປະສາດຕື່ນຕົວ ແລະ ເຄັ່ງຕຶງເກີນໄປ. ພວກເຮົາຈຳເປັນຕ້ອງມີຊ່ວງເວລາທີ່ປ່ອຍໃຫ້ໂລກໝູນໄປ ໂດຍທີ່ເຮົານັ່ງເບິ່ງຢູ່ຊື່ໆ ໂດຍບໍ່ຕ້ອງມີຄວາມຮູ້ສຶກຜິດ ວ່າໂຕເອງກຳລັງເສຍເວລາ.

ແນວທາງການປັບໃຊ້ຄື ການຈັດສັນເວລາຢ່າງໜ້ອຍ 15-30 ນາທີໃນແຕ່ລະວັນ ເພື່ອເຮັດສິ່ງທີ່ມັກ ແບບຊ້າໆ ໂດຍບໍ່ມີມືຖືມາລົບກວນ. ອາດຈະເປັນການນັ່ງຈິບກາເຟຍາມເຊົ້າ ພ້ອມທັງເບິ່ງນົກບິນຜ່ານ, ການປູກຕົ້ນໄມ້, ການຂຽນບັນທຶກປະຈຳວັນ ຫຼື ການນັ່ງສະມາທິ. ຊ່ວງເວລາທີ່ສະຫງົບເຫຼົ່ານີ້ ຈະເປັນພື້ນທີ່ປອດໄພ ທີ່ຊ່ວຍຈັດລະບຽບຄວາມຄິດ ເຮັດໃຫ້ເຮົາເຫັນພາບຮວມຂອງຊີວິດຊັດເຈນຂຶ້ນ ແລະ ຮູ້ວ່າເຮົາກຳລັງເດີນທາງໄປທາງໃດ ບໍ່ແມ່ນແຄ່ວິ່ງແລ່ນຕາມຄົນອື່ນໄປວັນໆ.

ບົດສະຫຼຸບແລ້ວ Slow Living ບໍ່ແມ່ນການໃຊ້ຊີວິດໃຫ້ຊ້າຄືຫອຍທາກ, ແຕ່ມັນຄືການໃຊ້ຊີວິດດ້ວຍ "ຈັງຫວະທີ່ເໝາະສົມ" ຂອງໂຕເອງ (Your Own Pace). ຢ່າປ່ອຍໃຫ້ຄວາມສຳເລັດຂອງຄົນອື່ນບົນໂລກໂຊຊ່ຽວ ມາບັງຄັບໃຫ້ເຮົາຕ້ອງແລ່ນຈົນຫາຍໃຈບໍ່ທັນ. ຄວາມສຸກທີ່ແທ້ຈິງ ບໍ່ໄດ້ວັດແທກກັນທີ່ວ່າເຮົາເຖິງເສັ້ນໄຊໄວປານໃດ, ແຕ່ມັນວັດແທກກັນທີ່ວ່າ ໃນລະຫວ່າງທາງທີ່ເດີນໄປນັ້ນ... ເຮົາໄດ້ເກັບກ່ຽວຮອຍຍິ້ມ ຄວາມອົບອຸ່ນໃນຄອບຄົວ ແລະ ຄວາມສະຫງົບໃນໃຈ ໄດ້ຫຼາຍສິດປານໃດ.

#SlowLiving #ຊີວິດມີສະຕິ #ແນວຄິດສ້າງສຸກ #ພັດທະນາຕົນເອງ #ຄວາມສຸກລຽບງ່າຍ

 📞 ສຳລັບຂໍ້ມູນເພີ່ມເຕີມ:

📞 ໂທລະສັບ / WhatsApp: 020 55296290
📧 ອີເມວ: anousone11@gmail.com 📝
 Blogger: anousonexayyalath.blogspot.com
📘 Facebook: Anousone XAYYALATH (ANSXYL)
📸 Instagram: https://www.instagram.com/anousone_xyl
🐦 X (Twitter): https://x.com/AnousoneChanel
✈️ Telegram: t.me/Anousone
🎵 TikTok: https://www.tiktok.com/@anousonechanel